3Jo | NdeIBE | STEP |

3 John

1 Mina omdala, Ngilobela umngane wami uGayiyu, engimthanda ngeqiniso.

2 Mngane wami othandekayo, ngiyakhuleka ukuba ube lempilo enhle, kanye lokuthi konke kukuhambele kuhle njengalokhu umphefumulo wakho uphila kuhle. 3 Kwakungithokozisa kakhulu ukuba labanye abazalwane abafika bangitshela ngokuthembeka kwakho eqinisweni kanye lokuthi uyaqhubeka uphila ngokumayelana leqiniso.

4 Angilakuthokoza okukhulu okudlula ukuzwa ukuthi abantwabami baphila ngokweqiniso.

5 Mngane othandekayo, uthembekile kulokho okwenzela abazalwane, lanxa nje kuwe bengabemzini. 6 Sebetshele ibandla ngothando lwakho. Uzakuba wenze kuhle ukubasiza ohambeni lwabo ngendlela efanele uNkulunkulu. 7 Baphuma ngenxa yeBizo, bengatholi sizo kwabangakholwayo. 8 Ngakho kufanele sitshengise ukuphana ebantwini abanjalo ukuze sisebenzele iqiniso ndawonye.

9 Ngalobela ebandleni, kodwa uDiyothrefe othanda ubukhulu, akayikuba lendaba lathi.

10 Ngakho ngingeza, ngizakukhangelisisa lokhu akwenzayo, esinyeya kubi. Kasuthiseki ngalokho, uyala ukwamukela abazalwane. Labafuna ukwenza njalo uyabalela abaxotshe ebandleni.

11 Bangane abathandekayo, lingalingiseli okubi kodwa okuhle. Lowo owenza okuhle ngokaNkulunkulu. Lowo owenza okubi kakamboni uNkulunkulu. 12 UDemetriyu unconywa ngabantu bonke – kanye laliqiniso uqobo. Lathi sikhuluma okuhle ngaye, njalo liyakwazi ukuthi ubufakazi bethu buliqiniso.

13 Kunengi engingalilobela ngakho, kodwa angifuni ukwenza njalo ngepheni leyinki.

14 Ngithemba ukulibona masinyane, lapho esizakhuluma ubuso ngobuso. 15 Ukuthula kakube kini. Abangane balapha bayalibingelela. Bingelela abangane abangapho ngamunye.